Poesia al giro di boa. Partita di caccia.

Tra la rocca du Schigghiu e li pantani
vola 'a barcuzza di patron Simuni,
si movi tra caloffari e muntanti
c'è quannu è in posta
e quannu gira erranti.
'U 'llanzaturi misu a puppa aspetta
assittatu sutta 'n suli a piccu,
aspetta uri e uri 'na vuciata
di l'omu misu supra di videtta.
Eccu 'mpruvisa comu 'na vintata
arriva la gridata du 'ntinneri,
" 'u pisci, 'u pisci... fora jusu,
tuttu paru... fora cammora".
Grida comu nu pazzu scatinatu
e cu brazzu cunnuci 'i vugaturi,
piegati supra 'i rimi 'u cori a mille,
chi spincinu 'u luntru com 'n trenu.
Supra la puppa sta patrun Simuni
fermu cu ferru 'n manu e l'occhiu vivu,
vidi 'na paricchia fuiri 'i piscispata
avanti o luntru chi assicuta forti.
Arrivati chi sunnu a orlu 'i barca
si fermanu li rimi e i vugaturi
'u 'llanzaturi cu manu chi non trema
'u ferru a tutta forza fa partiri.
Quannu Simuni 'llanza 'un c'è scampu,
pigghiata subbitu è la fimminedda,
la so' cursa, mischina, ora rallenta
e a sagula è 'n sirpenti chi l'assicuta.
Ma c'è lu masculu chi 'un s'alluntana,
non scappa pi salvari la so' vita,
Simuni afferra lu sicunnu ferru,
parti lu ferru e la partita è chiusa.

Dino Fornaro