Palermo, 1866 - 2016: “A rivorta dû setti e menzu”

 U 16 Sittèmmiru dû 1866, precisamenti 150 anni fa, ci fu n'Palermu
“A rivorta dû setti e menzu”,
accussì chiamata picchì durò setti jorna e menzu.

Doppu sei anni di unità cu l’Italia, i siciliani avìanu caputu ca ‘u novu era peggiu dû vecchiu: di l’assolutismu borbonicu avìamu passatu a nova tirannia, na situazioni ideali pî ricchi e pî burgisi. ‘A rivolta dû setti e menzu fu un cummattimentu violentu tra chiddi ca vulìanu colonizzari la sicilia, e chiddi ca pinzàvanu ca s’avìanu liberatu dû dispotismu e dâ riprissiuni.

‘U motu accuminciò ‘u 16 Sittèmmiru dû 1866, ‘a genti, gridannu “Viva santa Rusulia”, tincìu di banneri russi ‘u celu di Palermu; foru assai chiddi ca parteciparu a ‘ddi jurnati e, puru si eranu diversi ntra di iddi (ripubblicani, socialisti, indipendentisti, mazziniani, contadini c’avìanu cridutu â prumissa di Garibaldi dâ distribuzioni dâ terra e avìanu ricivutu sulu scupittati e pistulittati, e àutri), tutti odiàvanu ‘u novu regimi italu-piemuntisi, c’avìa purtatu sulu tassi, puvirtà e sirviziu militari obbligatoriu.

‘A rivorta nun appi nuddu leader carismaticu, ma fu ‘a genti dî quarteri populari a essiri u vIru capu dâ rivoRta. ‘A notti tra ‘u 15 e ‘u 16 Sittèmmiru nnê muntagni di Palermu s’addumaru milli fochi, eranu i signali dâ rivorta ca dî campagni vinìanu mannati â città: ê cincu câ matinata, na marina di genti cû sangu nta l’occhi, ca vinìa di Munriali e dî quarteri popolari di Palermu, jincheva i strati dâ città arrivannu nzina ê Quattro Canti e in via Maqueda, sparannu a ogni suldatu e carabineri ca si truvava di davanzi, e ‘a stissa cosa succidìa nnê paisi chiù addintrati, puru si ‘u centru dâ rivorta ristava Palermu.

Una doppu l’àutra i casermi dî carabineri foru cunquistati, e nnô giru di pochi uri i ribelli s’avìanu pigghiatu ‘a città; ‘u 17 Sittèmmiru ‘a genti occupò e distruggìu ‘u municipiu, obbligannu i suldati e ‘u sinnacu a scapparisinni dintra ‘u Palazzu Riali; ntantu si cuntinuava a cummàttiri senza pietà a l’Ucciarduni e ô Casteddu a Mari. ‘A battàgghia accuminciò però a ribaltàrisi tra ‘u 18 e ‘u 20 Sittèmmiru contra i ribelli, c’avìanu addivintatu oramai 18 mila, ‘u Statu italianu mannò i so’ rinforzi, accuminciò a bummardari a tappitu i quarteri popolari, massacrannu e scannannu ‘u nostru popolu chinu di valìa e onuri.

I morti foru assai, ma nta ‘ddi setti eroichi jurnati i palermitani pruvaru a liberàrisi: spirannu finalmenti d’esseri i patruna dû pròpiu distinu, dû pròpiu futuru e dâ pròpia città. Davanzi â riprissiuni e â miseria di l’Italia appena nata, ca mannava picciuli ô Nord e lassava puvirtà ô Sud, chiossai di un terzu dî Siciliani, pi disperazioni o pi fami, appi a lassari senza vulillu ‘a pròpia terra.

È facili dunca capiri nzoccu lassò l’unità d’Italia nnâ nostra terra, i siciliani avìanu sulu du’ strati: briganti o emigranti.

(https://www.evensi.it/corteu-onuri-ai-picciotti-da-rivorta-du-setti-e-menzu/186406238)